Мар’ян Дукса – вядомы беларускі пісьменнік – першымі красавіцкімі днямі адзначае свой 70-гадовы юбілей.

Мар’ян Мікалаевіч нарадзіўся 5 красавіка 1943 года на хутары каля вёскі Каракулічы Мядзельскага раёна. Закончыў завочна філалагічны факультэт БДУ. Жыве ў вёсцы Солы Смаргонскага раёна Гродзенскай вобласці. Усё жыццё працаваў настаўнікам беларускай і рускай мовы і літаратуры. Член Саюза пісьменнікаў з 1969 года. Лаўрэат літаратурнай прэміі імя А. Куляшова.

Першы верш быў апублікаваны ў мядзельскай раённай газеце “Савецкая вёска” у 1960 годзе. Мар’ян Дукса рэгулярна выступае з вершамі ў “ЛіМе”, “Полымі”, “Маладосці”, “Нёмане”, “Аve Mariа” і “Нашай веры”. Усяго выдадзена 17 кніг паэзіі, з іх чатыры для дзяцей, адна ў перакладзе на рускую мову. Кніга “Заснежаныя ягады” у 1990 годзе была адзначана Літаратурнай прэміяй імя Аркадзя Куляшова. Вершы друкаваліся і за межамі Беларусі ў перакладзе на рускую, украінскую, балгарскую і польскую мовы.

Паэзія Мар’яна Дуксы вызначаецца высокай духоўнасцю, абвостраным адчуваннем часу. Фармальныя пошукі для паэта ніколі не з’яўляліся галоўнымі, на першым плане ў яго заўсёды стаіць думка, ідэя. Лірычны герой паэзіі М. Дуксы – гэта чалавек высокіх маральна-этычных якасцей, неабыякавы да лёсу сучаснікаў і Радзімы. Спасціжэнне Бога, пошукі адказаў на складаныя духоўныя пытанні, як, напрыклад. у кнізе “Прыйсці да алтара”, надаюць яго паэзіі светласці, узрушанасці і ўзнёсласці.

Мар’ян Дукса вядзе актыўную грамадска-культурную і асветніцкую дзейнасць: выступае перад грамадзянамі розных узроставых катэгорый вобласці і раёна, з’яўляецца членам Савета Гродзенскай абласной арганізацыі пісьменнікаў.

Пісьменнікі Гродзенскага абласнога аддзялення віншуюць Мар’яна Мікалаевіча з гэтай юбілейнай датай і жадаюць яму моцнага здароўя, радасці, вясновага настрою і надалей шчаслівага ўзыходжання на літаратурныя вяршыні!

Вось толькі некалькі ссылак у інтэрнэце, дзе асвячаецца творчасць нашага калегі:

http://vershy.ru/category/maryan-duksa

http://www.stihi.ru/2012/01/30/2485

http://traditio-ru.org/wiki/%D0%9C%D0%B0%D1%80%D0%B8%D0%B0%D0%BD_%D0%94%D1%83%D0%BA%D1%81%D0%B0

http://media.catholic.by/nv/n16/art13.htm